پاکستان کا نیوزی لینڈ کیخلاف ٹاس جیت کر بولنگ کا فیصلہ

ورلڈ کپ کے 35 ویں میچ میں پاکستان نے نیوزی لینڈ کے خلاف ٹاس جیت کر پہلے بولنگ کرانے کا فیصلہ کیا ہے۔

نیوزی لینڈ کی جانب سے ڈیون کونوے اور رچن رویندرا نے اننگ کا آغاز کیا جبکہ شاہین آفریدی نے اننگ کا پہلا اوور کرایا۔

نیوزی لینڈ کے اوپنرز نے پارٹنرشپ قائم کر کے اسکور 68 رنز تک پہنچایا جس کے بعد 10.5 اوورز میں ڈیون کونوے 35 رنز پر حسن علی کی گیند پر محمد رضوان کے ہاتھوں کیچ آؤٹ ہوئے۔

بعدازاں کپتان کین ولیمسن بیٹنگ کرنے کے لیے آئے اور انہوں نے بھی رچن رویندرا کے ساتھ پارٹنرشپ قائم کی اور دونوں بیٹرز نے اچھے رن ریٹ کے ساتھ بیٹنگ جاری رکھی اور اسکور 34 اوورز میں 246 رنز تک پہنچا دیا۔

اس دوران رچن رویندرا نے اپنی سنچری جبکہ کین ولیمسن نے نصف سنچری بنائی۔

نیوزی لینڈ کی دوسری وکٹ 34.2 اوورز میں 248 رنز پر گری جب کپتان کین ولیمسن 95 رنز بنا کر افتخار احمد کی گیند پر فخر زمان کے ہاتھ کیچ آؤٹ ہوئے۔

اگلے ہی اوور میں نیوزی لینڈ کی تیسری وکٹ 261 رنز پر گر گئی جب رچن رویندرا 108 رنز بنا کر محمد وسیم کی گیند پر سعود شکیل کے ہاتھوں کیچ آؤٹ ہوئے۔

پاکستان کے خلاف نیوزی لینڈ کی چوتھی وکٹ 41.1 اوورز میں 318 رنز پر گری جب ڈیرل مچل کو 29 رنز پر حارث رؤف نے بولڈ کیا۔

نیوزی لینڈ کی پانچویں وکٹ 44.3 اوورز میں 345 رنز پر گری، محمد وسیم نے مارک چیپمین کو 39 رنز پر بولڈ کیا۔

نیوزی لینڈ کی چھٹی وکٹ 48.5 اوورز میں 388 رنز پر گری، محمد وسیم نے گلین فلپس کو 41 رنز پر بولڈ کیا۔

ٹاس کے بعد گفتگو کرتے ہوئے پاکستان کرکٹ ٹیم کے کپتان بابر اعظم نے کہا کہ ہم نے پچھلے میچز میں اچھی بولنگ کی ہے، ٹیم میں ایک تبدیلی کی ہے۔

اس موقع پر نیوزی لینڈ کے کپتان کین ولیمسن نے کہا کہ اچھا ہدف دینے کی کوشش کریں گے، ٹیم میں 2 تبدیلیاں کی ہیں۔

کین ولیمسن نے بتایا کہ اِش سودھی کی جگہ میٹ ہینری اور وِل ینگ کی جگہ میری واپسی ہوئی ہے، میری ورلڈ کپ کے لیے تیاری محدود رہی۔

پاکستان ٹیم

آج کے میچ کے لیے بابر اعظم ،عبداللّٰہ شفیق، فخر زمان، محمد رضوان، سعود شکیل، افتخار احمد، سلمان آغا، حسن علی، شاہین آفریدی، محمد وسیم جونیئر اور حارث رؤف پاکستان کی پلیئنگ الیون میں شامل ہیں۔