انور مقصود کے اغوا ء کی حقیقت سامنے آگئی

کراچی (ویب ڈیسک) پاکستانی مصنف انور مقصود کے اغواء کی خبروں کی حقیقت سامنے آگئی۔

معروف مزاح نگار، مصنف اور نقاد انور مقصود نے اپنے حالیہ متنازعہ بیان پر پیدا ہونے والی غلط فہمیوں پر وضاحت دی اور انہوں نےاس موقع پر ان خبروں کی بھی سختی سے تردید کی جن میں ان کے اغوا یا انہیں ’اوپر‘ سے کال آنے کے دعوے کیے جا رہے تھے۔

انہوں نے وضاحت کی کہ وہ بخیر و عافیت ہیں اور ایسی تمام افواہیں بے بنیاد ہیں، ان کے بیان کا مقصد کسی کی دل آزاری کرنا ہرگز نہیں تھا اور وہ ہمیشہ اپنے تبصروں میں طنز و مزاح کا سہارا لیتے ہیں۔

انور مقصود کا کہنا تھا کہ وہ پاکستان کے تمام اداروں، بشمول نیوی اور مسلح افواج کا احترام کرتے ہیں۔
یاد رہے کہ سوشل میڈیا پر یہ خبریں گردش کر رہی تھیں کہ انور مقصود کو اغوا کرلیا گیا ہے جس پر ساتھی اداکاروں سمیت سوشل میڈیا صارفین کی جانب سے تشویش کا اظہار کیا جارہا تھا۔