گلوکارہ نصیبو لال کے شوہر کو گرفتار کرلیاگیا

لاہور (ویب ڈیسک) جھگڑے کے بعد شاہدرہ کے علاقے میں فائرنگ کرنے والے گلوکارہ نصیبو لال کے شوہر کو گرفتار کرلیاگیا، فائرنگ سے ایک شخص زخمی بھی ہوا تھا۔

پولیس کے مطابق گلوکارہ کے شوہر نوید بلوچ کو شاہدرہ ٹاؤن میں اپنے محلے میں فائرنگ کرکے ایک شخص کو زخمی کرنے کے کیس میں گرفتار کیا گیا،پولیس کی مدعیت میں مقدمہ دائر کرکے ان کے شوہر نوید بلوچ کو گرفتار کرکے تھانے لایا گیا۔

مقدمے میں موقف اختیار کیا گیا کہ ملزم نوید بلوچ اور دیگر اہل محلہ کے افراد میں لڑائی جھگڑا ہوا، جھگڑے کے دوران نوید بلوچ کی فائرنگ سے ایک شخص زخمی ہواتھا جسے فوری طور پر ہسپتال منتقل کردیا گیا۔

لاہور پولیس نے جائے وقوع پر پہنچ کرملزم نوید بلوچ کو گرفتار کرکے تھانے منتقل کیا، جنہیں رہا کرانے کے لیے نصیبو لال بھی تھانے پہنچی اور پوری رات تھانے میں گزاری فوری طور پر نصیبو لال نے واقعے پر کوئی بیان جاری نہیں کیا جب کہ متاثرہ فریقین کی جانب سے بھی تاحال کوئی موقف سامنے نہیں آ سکا۔