بیرون ملک جانیوالے جوان افراد کی سخت نگرانی کا فیصلہ، مراسلہ جاری کردیا گیا
اسلام آباد (ویب ڈیسک) انسانی سمگلنگ روکنے کیلئے وفاقی تحقیقاتی ایجنسی ( ایف آئی اے )نے 20سال بعد ایڈوائزری جاری کردی اور اس سلسلے میں ملک بھر کے ڈپٹی ڈائریکٹرز امیگریشن کو مراسلہ جاری کردیا گیا جس میں 15ممالک، پاکستان کے 9شہروں اور 2ائیرلائنز کے مسافروں کی کڑی نگرانی کی ہدایات جاری کی گئی ہیں۔
تفصیل کے مطابق مراسلے میں پہلی دفعہ بیرون ملک کے 15سے 40سال عمر کے مسافروں پر نگرانی سخت کرنے کا حکم دیا گیا ہے۔ فلائی دبئی اور اتھوپین ایئر لائنز کے جوان العمر مسافروں کی سخت چیکنگ کرنے کے بھی احکامات جاری کئے گئے ہیں۔ آذربائیجان، ایتھوپیا، سینگال کینیا، روس، سعودیہ، مصر ،لیبیا، ایران، موریطانیہ، عراق ترکیہ، قطر، کویت، کرغیزستان کے مسافروں کی بھی پروفائلنگ کی ہدایات دی گئی ہیں۔ 15ممالک کو پاکستانیوں نے یورپ میں انسانی سمگلنگ کیلئے ٹرانزٹ کے طور پر استعمال کیا۔ ان ممالک کے وزٹ، سیاحت، مذہبی یا تعلیمی ویزوں پر مسافروں کی نقل و حرکت کا جائزہ لیا گیا۔
ایڈوائزری جولائی تا دسمبر آئی بی ایم ایس کے ڈیٹا بیس کے تجزیے سے تیار کی گئی۔ ایڈوائزری کے مطابق منڈی بہاؤالدین، گجرات، سیالکوٹ، گوجرانوالہ، بھمبر ،جہلم، ٹوبہ ٹیک سنگھ، حافظ آباد اور شیخوپورہ کے مسافروں کی پروفائلنگ کے بہتر اقدامات کرنے کا بھی حکم دیا گیا ہے۔ ریٹرن ٹکٹس، ہوٹل بکنگ سمیت تمام دستاویزات کی مکمل چھان بین کی جائے۔ وزٹ یا سیاحتی ویزوں پر خصوصی توجہ کے ساتھ دستاویز کی چھان بین کریں۔
About The Author
