سوڈان میں سعودی ہسپتال پر ڈرون حملہ، ہلاکتیں
خرطوم (ویب ڈیسک) افریقی ملک سوڈان کے علاقے دارفور میں الفاشر شہر میں سعودی زیراہتمام ہسپتال پر ایک پراسرار ڈرون حملے کے نتیجے میں 30 افراد جاں بحق اور درجنوں زخمی ہوگئے، جمعہ کی شام ہونے والے حملے میں ہسپتال کی ایمرجنسی عمارت مکمل طور پر تباہ ہوگئی۔
طبی ذرائع نے خبر ایجنسی اے ایف پی کو بتایا کہ سعودی ہسپتال کے ایمرجنسی یونٹ پر حملہ ہوا، تاہم انہوں نے انتقامی کارروائی کے خدشے کے باعث نام ظاہر نہ کرنے کی درخواست کی۔ حملہ کرنے والوں کے بارے میں فوری طور پر معلوم نہیں ہوسکا کہ یہ کس نے کیا ہے۔
اقوام متحدہ نے دونوں فریقوں سے شہری آبادی کے تحفظ کو یقینی بنانے کی اپیل کی ہے۔ الفاشر شہر میں دو ملین سے زائد افراد رہائش پذیر ہیں جو کئی مہینوں کی جنگی صورت حال سے شدید متاثر ہیں۔ اقوام متحدہ کے حقوق کے ترجمان سیف مگانگو نے کہا "الفاشر کے لوگوں نے بے شمار ظلم اور بے حس تشدد برداشت کیا ہے۔”
سعودی ہسپتال کے ایمرجنسی یونٹ پر چند ہفتے پہلے بھی آر ایس ایف کی جانب سے ڈرون سے حملہ کیا گیا تھا۔ اطلاعات کے مطابق آر ایس ایف کے زیرِ کنٹرول نیالا ایئرپورٹ پر جدید چینی ساختہ ڈرون موجود ہیں، جو فضائی نگرانی اور جنگی حملے کرنے کی صلاحیت رکھتے ہیں۔ امریکی حکومت نے آر ایس ایف پر دارفور میں "نسل کشی” کا الزام عائد کیا ہے اور سوڈانی فوج اور آر ایس ایف دونوں پر شہریوں کو نشانہ بنانے اور جنگی جرائم کا ارتکاب کرنے کا دعویٰ کیا ہے۔
طبی تنظیم "ڈاکٹرز ودآؤٹ بارڈرز” کے مطابق سعودی ہسپتال الفاشر میں واحد عوامی ہسپتال ہے جو اب بھی سرجری کی سہولت فراہم کر رہا ہے لیکن مسلسل حملوں کے باعث صحت کی خدمات بھی ختم ہونے کے خطرے سے دوچار ہیں۔
About The Author
