راکھی ساونت نے 10 پاکستانیوں سمیت 20 افراد کو عمرے پر بھیج دیا

ممبئی (ویب ڈیسک) پاکستان آنے اور پاکستانی شہری سے شادی کے بیانات کی وجہ سے حال ہی میں پاکستانی میڈیا کی شہہ سرخیوں میں جگہ بنانے والی بھارتی اداکارہ راکھی ساونت نے اپنے ذاتی خرچ پر 20 افراد کو مبینہ طور پر عمرے کی سعادت حاصل کرنے کے لیے بھیج دیا۔

اپنے ویڈیو پیغام میں راکھی ساونت نے بتایا کہ وہ 10 پاکستانی اور 10 بھارتی شہریوں کو عمرے پر بھیج رہی ہیں، وہ ہر سال اپنی آمدنی کا ایک مخصوص حصہ جنوبی ایشیا میں انسانی فلاح و بہبود کے کاموں کے لیے وقف کریں گی، چاہے ان کا تعلق کسی بھی مذہب یا پس منظر سے ہو۔

یادرہے کہ راکھی ساونت اس وقت دبئی میں مقیم ہیں اور اس موقع پر انہوں نے عمرے پر جانے والوں میں کھانا اور احرام بھی تقسیم کیے۔

اپنے ویڈیو پیغام میں اداکارہ نے کہا کہ یہ پہلی بار ہے کہ میں ان کو لوگوں کو عمرے پر بھیج رہی ہوں، اس لیے تھوڑی نروس بھی ہوں بس اللہ میرے اس نیک کام کو قبول فرمائے۔