اداکارہ ریشم نے خلیل الرحمان قمر کیساتھ اپنا تلخ تجربہ شیئر کردیا

لاہور (ویب ڈیسک) پاکستانی فلم و ٹیلی ویژن انڈسٹری کی مشہور اداکارہ ریشم نے خلیل الرحمان قمر کے ساتھ اپنے ایک تلخ تجربے کو شیئر کردیا۔

حال ہی میں ایک انٹرویو کے دوران جب میزبان نے ریشم سے پوچھا کہ اگر ان کی اور خلیل الرحمٰن قمر کی ملاقات ہوجائے تو وہ کیا کریں گی؟ تو ریشم نے ایک پرانی بات یاد کرتے ہوئے بتایا کہ کس طرح قمر نے ان کے ساتھ بدتمیزی کی۔

انہوں نے بتایا، ’’جب خلیل الرحمٰن قمر کا ڈرامہ ’’میرے پاس تم ہو‘‘ آن ایئر ہوا، تو میں نے ہمایوں سعید کو اپنے گھر مدعو کیا۔ بعد میں، میں ہمایوں کے ساتھ ایک تقریب میں گئی، جہاں خلیل الرحمٰن قمر بھی موجود تھے۔ میں نے انہیں دیکھ کر سلام کیا، لیکن انہوں نے سلام کا جواب دینے کے بجائے مجھ سے بدتمیزی کرتے ہوئے کہا، دور ہوجاؤ، میں تم سے بات بھی نہیں کرنا چاہتا۔‘‘

ریشم نے کہا کہ وہ قمر کو اس کا جواب دے سکتی تھیں، لیکن انہوں نے اپنی عزت کی خاطر خاموشی اختیار کی۔ ان کا کہنا تھا، ’’مجھے اینٹ کا جواب پتھر سے نہیں، اینٹ سے دینا آتا ہے، لیکن میں نے اسکینڈل سے بچنے کےلیے خاموشی اختیار کی۔‘‘

یادرہے کہ یہ پہلی بار نہیں ہے جب ریشم نے خلیل الرحمٰن قمر پر تنقید کی ہے۔ ماضی میں بھی انہوں نے قمر کو ماہرہ خان اور نعمان اعجاز کے خلاف دیے گئے متنازع بیانات پر تنقید کا نشانہ بناتے ہوئے کہا تھا کہ انہیں اپنی صحت پر توجہ دینی چاہیے۔