داؤد ابراہیم کے مبینہ قریبی ساتھی دانش چکنا کو بھارت میں گرفتار کرلیا گیا

ممبئی (ویب ڈیسک) گینگسٹر داؤد ابراہیم کے مبینہ اہم ساتھی دانش مرچنٹ المعروف دانش چکنا کو منشیات کے ایک کیس میں بھارتی پولیس نے گرفتار کر لیا ،ملزم مبینہ طور پر ڈونگری علاقے میں داؤد کی منشیات کی سرگرمیوں کا انچارج تھا جسے ساتھی سمیت گرفتار کر لیا گیا۔

بھارتی میڈیا کے مطابق ممبئی پولیس نے بتایا کہ ملزم کی گرفتاری مہینوں پر محیط ان تحقیقات کے بعد عمل میں آئی جو گزشتہ ماہ دو ملزمان محمد عاشق الرحمن اور ریحان شکیل انصاری کی گرفتاری سے شروع ہوئی تھی۔
این ڈی ٹی وی کے مطابق گرفتاریوں کا یہ سلسلہ 8 نومبر کو شروع ہوا، جب مرین لائنز سٹیشن کے قریب سے 144 گرام منشیات کے ساتھ عاشق الرحمان کو گرفتار کیا گیا۔

تفتیش کے دوران عاشق نے انکشاف کیا کہ یہ منشیات ڈونگری میں انصاری سے حاصل کی گئی تھیں۔ ان معلومات پر عمل کرتے ہوئے پولیس نے انصاری کو گرفتار کیا اور مزید 55 گرام منشیات ضبط کیں۔ انصاری نے مزید بتایا کہ یہ منشیات دانش مرچنٹ اور ان کے ساتھی قادر فانٹا نے فراہم کی تھیں۔

اب ایک محتاط آپریشن کے ذریعے دونوں کو گرفتار کیا گیا۔ پوچھ گچھ کے دوران ان دونوں نے منشیات کے اس ریکٹ میں ملوث ہونے کا اعتراف کیا۔