ایک عرصہ بعد شیخ رشید پھر سامنے آگئے

راولپنڈی (ویب ڈیسک) عمران خان کے اتحادی اور سابق وزیرداخلہ شیخ رشید احمد ایک عرصہ بعد پھر سامنے آگئے اور کہاکہ مذاکرات کی بیل چڑھتی نظر نہیں آ رہی، دعا ہے کامیاب ہو جائیں۔

اے ٹی سی عدالت کے باہر گفتگو کرتے ہوئے عوامی مسلم لیگ کے سربراہ نے کہا کہ مذاکرات کو مذاق کی رات نہ بنایا جائے، جیلیں آباد اور غریب لوگ برباد ہو رہے ہیں، چاہتے ہیں کہ مذاکرات سے جیلوں کے دروازے کھلیں اور جوڈیشل کمیشن بنے۔

انہوں نے کہا کہ سیاسی قیدیوں کو معافی دی جائے، حکومتیں معافی دیتی ہیں، حکومت اس وقت عالمی دباؤ کا شکار ہے یہ نہ ہو معیشت مزید بیٹھ جائے، حکومت کے ساتھ عوام نہیں، آئندہ ہفتوں میں اہم فیصلے کرنا ہوں گے،مجھ پر اتنے کیسز بنا دیئے گئے کہ زندگی سے اکتاہٹ پیدا ہو چکی ہے۔