گرل فرینڈ سے جھگڑ کر جہاز کا ایمرجنسی گیٹ کھولنے کی کوشش لڑکے کو مہنگی پڑگئی

لاس اینجلس (ویب ڈیسک) امریکا میں ایک شخص کو گرل فرینڈ سے جھگڑے کے بعد پرواز کا ایمرجنسی دروازہ کھولنے کی کوشش پر گرفتار کر لیا گیا تاہم ملزم کو عدالت سے ضمانت مل چکی ہے۔

امریکی شہر بوسٹن میں قائم لوگن ایئر پورٹ پر ٹیکسنگ کے دوران پورٹو ریکو کے ایک مسافر نے اپنی گرل فرینڈ سے مبینہ بحث کے بعد دروازہ کھول کر طیارے سے چھلانگ لگانے کی کوشش کی جس کو ایک اور مسافر نے ناکام بنایا۔

ایک مسافر فریڈ وائن کا کہنا تھا کہ بوائے فرینڈ اور گرل فرینٹ ان کے پیچھے بیٹھی سیٹ پر لڑ رہے تھے۔ لڑکا غصے میں آیا، درمیان میں جا کر ایمرجنسی دروازہ مکمل کھول دیا۔ ایک ایف بی آئی اہلکار نے اس کو پکڑا، ہتھکڑی لگائی۔تھوڑی دیر بعد ریاستی پولیس آئی اور ملزم کو ساتھ لے گئی۔

ایک عینی شاہد کے مطابق مورالز ٹوریز اپنی گرل فرینڈ کے ساتھ جھگڑ رہے تھے جب انہوں نے پورٹو ریکو کے شہر سان ژوان جانے والی فلائٹ 161 کا اچانک دروازہ کھولا۔میساچوسیٹس اسٹیٹ پولیس موقع پر مقامی وقت کے مطابق رات 7 بجکر 25 منٹ پر پہنچی اور مورالز کو گرفتار کر لیا۔