چیمپئنز ٹرافی، پاکستان نے ٹیم کا اعلان کردیا
لاہور (ویب ڈیسک) پاکستان کرکٹ بورڈ (پی سی بی) نے آئی سی سی چیمپئنز ٹرافی 2025 کے لیے 15 رکنی سکواڈ کا اعلان کر دیا ہے،پی سی بی کے مطابق پندرہ کھلاڑیوں پر مشتمل سکواڈ میں چار تبدیلیاں کی گئی ہیں ۔
تفصیل کے مطابق چیمپئنز ٹرافی پاکستان میں 19 فروری سے 9 مارچ تک منعقد ہوگی۔ پی سی بی کے پاس سکواڈ میں تبدیلی کے لیے 11 فروری تک کا وقت ہے اس کے بعد تبدیلی کی اجازت صرف طبی بنیادوں پر آئی سی سی ایونٹ ٹیکنیکل کمیٹی کی منظوری سے ہوگی۔
چیمپئنز ٹرافی کے لیے ٹیم میں چار تبدیلیاں کرتے ہوئے عبداللہ شفیق، محمد عرفان خان، صائم ایوب اور سفیان مقیم کی جگہ فہیم اشرف، فخرزمان ، خوشدل شاہ اور سعود شکیل کو ٹیم میں شامل کیا گیا ہے، بیٹرز کیلئے بابر اعظم، فخر زمان، کامران غلام، سعود شکیل اور طیب طاہر کو منتخب کیا گیا ہے۔
آل راؤنڈرز میں فہیم اشرف ، خوشدل شاہ اور سلمان علی آغا (نائب کپتان ) کو شامل کیا گیا ہے جبکہ محمد رضوان کپتان ہوں گے جب کہ عثمان خان بھی ٹیم کا حصہ ہوں گے۔
سپیشلسٹ سپنر کے طور پر ابرار احمد جب کہ فاسٹ بولرز کے طور پر حارث رؤف، محمد حسنین، نسیم شاہ اور شاہین شاہ آفریدی کو ٹیم میں جگہ ملی ہے۔
پاکستان سکواڈ میں 2017 چیمپئنز ٹرافی کا ٹائٹل جیتنے والی ٹیم کے تین کھلاڑی بابر اعظم، فہیم اشرف اور فخر زمان شامل ہیں۔ خیال رہے کہ پاکستان چیمپئنز ٹرافی میں اپنا پہلا میچ19 فروری کو نیوزی لینڈ کے خلاف کراچی میں کھیلے گا۔
About The Author
