جب تک قوم خصوصا نوجوان ساتھ کھڑے ہیں پاک فوج کبھی نہیں ہارے گی، ریاست کے سامنے سرنڈر کرنے والے رحم کی توقع کر سکتے ہیں: آرمی چیف
راولپنڈی(ویب ڈیسک )آرمی چیف جنرل سید عاصم منیر نے کہا ہے کہ دشمن کو اپنی فرسودہ سوچ کبھی ملک پر مسلط نہیں کرنے دیں گے،جب تک قوم خصوصا نوجوان ساتھ کھڑے ہیں پاک فوج کبھی نہیں ہارے گی، ہم کامریڈ کی طرح لڑتے ہیں،ہمارے لیے پاکستانیت سب سے اہم ہے تاہم ریاست کے سامنے سرنڈر کرنے والے رحم کی توقع کر سکتے ہیں۔
پاکستان بھر کی مختلف جامعات سے آئے طلبا سے خصوصی گفتگو کرتے ہوئے آرمی چیف کا کہنا تھا کہ ملک کے نوجوانوں سے گفتگو میرے لئے انتہائی خوشی کی بات ہے، پاکستانی عوام بالخصوص نوجوانوں کا پاک فوج سے ایک انتہائی مضبوط رشتہ ہے، ملک دشمن عناصر کی فوج اور عوام کے درمیان خلیج ڈالنے کی کوشش ہمیشہ ناکام رہی ہے اور رہے گی، ہمارے لیے پاکستانیت سب سے اہم ہے اور ہمیں اس سے محبت ہے، ہم آج کل فتنہ الخوارج کے فسادیوں سے لڑ رہے ہیں، یہ عناصر اسلام کی غلط تشریح کر رہے ہیں، یہ خوارج ہیں اور دین سے نکلے ہوئے ہیں، خارجی عناصر اسلامی تعلیمات کی خلاف ورزی کر رہے ہیں۔
ان کا کہناتھاکہ ہمیں اپنے مذہب، تہذیب اور روایات پر فخر ہے، فتنہ الخوارج کو اپنی فرسودہ سوچ ملک پر مسلط نہیں کرنے دینگے،فسادیوں کے بارے میں اسلام کے احکامات بہت واضح ہیں، خیبرپختونخوا اور بلوچستان کے عوام دہشتگردوں کیخلاف آہنی دیوار کی طرح کھڑے ہیں، اسلام نے خواتین کو خصوصی حقوق دیئے ہیں، اسلام نے ہر حیثیت میں عورت کو حقوق دیئے ہیں، خارجیوں کو یہ کس نے اختیار دیا کہ وہ خواتین سے حقوق چھین لیں؟ اسلام کے دیئے ہوئے حقوق کو کوئی نہیں چھین سکتا، گمراہ گروہ کو ملک پر اپنے نظریات مسلط نہیں کرنے دیں گے۔
About The Author
