مصطفی قتل کیس، ملزم ارمغان مزید 5 روزہ ریمانڈ پر پولیس کے حوالے، پھر عدالت میں بے ہوش
کرا چی (ویب ڈیسک ) مصطفی عامر قتل کیس کے مرکزی ملزم ارمغان قریشی کے مزید ریمانڈ پر محفوظ فیصلہ سناتے ہوئے انسداد دہشت گردی عدالت نےاسے پانچ روزہ ریمانڈ پر پولیس کے حوالے کردیا۔
تفصیل کے مطابق چار روزہ ریمانڈ مکمل ہونے پر ملزم ارمغان کو انسداد دہشتگردی عدالت(اے ٹی سی تھری) میں پیش کیا گیا جہاں پولیس کی جانب سے مزید ریمانڈ کی استدعا کی گئی۔اس موقع پر ملزم ارمغان کے والد کامران قریشی بھی عدالت پہنچے اور ملزم سے ملنے کی کوشش کی، تاہم، پولیس اہلکاروں نے ملزم سے والد کو ملنے نہیں دیا۔
دوران سماعت عدالت نے ملزم ارمغان سے استفسار کیا کہ کیا آپ کو مارا ہے؟ جس پر ملزم ارمغان نے کہا کہ مجھے مارا ہے، اور یہ کہہ کر ملزم گر گیا اور بظاہر ایک بار پھر بے ہوش ہوگیا۔ عدالتی عملے نے ملزم پر پانی چھڑکا جس کے بعدہوش میں آنے پر ملزم ارمغان نے عدالت کو بتایا کہ مجھے کھانا نہیں دیا گیا، مجھے پولیس بلوچستان لے کر گئی اور کہا کہ گولی مار دیں گے۔
پولیس نے عدالت میں بیان دیا کہ باپ کے اشارہ کرنے پر ملزم گر کر بے ہوش ہوا ہے۔پولیس نے کہا کہ ملزمان کا 164 کا بیان کرانا ہے۔ملزم کے وکیل خرم عباس نے کہا کہ اتنی چیزیں بتا رہے ہیں لیکن ریکارڈ پر کچھ نہیں ہے، شریک ملزم شیراز سے سائن نہیں کرانے دے رہے، جبکہ پولیس والے ملزم کے انٹرویو کروا رہے ہیں۔
عدالت نے ملزمان ارمغان اور شیراز کے جسمانی ریمانڈ کی استدعا پر فیصلہ محفوظ کرلیا، جسے تھوڑی دیر بعد سنا دیا گیا۔
About The Author
