چیمپئنز ٹرافی کا پہلا سیمی فائنل ،آسٹریلیا کو شکست ، بھارت فائنل میں پہنچ گیا

دبئی (ویب ڈیسک) چیمپئنز ٹرافی 2025 کےپہلے سیمی فائنل میں بھارت نے دلچسپ مقابلے کے بعد آسٹریلیا کو شکست دے کر فائنل کیلئے کوالیفائی کرلیا،آسٹریلیا کی جانب سے دیا گیا 265 رنز کا ہدف بھارت ٹیم نے 5 وکٹوں کے نقصان پر 49ویں اوور میں پورا کرلیا۔ ہدف کے تعاقب میں بھارتی ٹیم کے اسٹار بلے باز ویرات کوہلی نے ذمہ دارانہ بیٹنگ کا مظاہرہ کرتے ہوئے 84 رنز بنا کر اپنی ٹیم کی جیت میں کلیدی کردار ادا کیا۔

دبئی کرکٹ اسٹیڈیم میں کھیلے گئے اس میچ میں آسٹریلیا نے بھارت کے خلاف ٹاس جیت کر پہلے بیٹنگ کرنے کا فیصلہ کیا تھا۔ٹاس ہارنے کے بعد بھارتی ٹیم کو آغاز تو اچھا ملا لیکن صرف تھوڑی دیر کا، تیسرے اوور میں 4 رنز پر پہلی وکٹ گرنے کے بعد آسٹریلوی بیٹرز نے اچھی بیٹنگ کی اور 8 اوور میں اسکور 53 تک پہنچا دیا۔بعدازاں اگلے اوور میں آسٹریلیا کی دوسری وکٹ 54 رنز پر گر گئی جب سیٹ ہونے والے بیٹر ٹریوس ہیڈ 39 رنز بنا کر کیچ آئوٹ ہوگئے۔اس کے بعد اسٹیو اسمتھ اور مارنس لبوشین نے دوبارہ پارٹنرشپ قائم کی ٹیم کو 110 کے ہندسے تک پہنچایا، تاہم اس موقع پر لبوشین 29 رنز بنا کر رویندرا جاڈیجا کی گیند پر ایل بی ڈبلیو آٹ ہوگئے۔

چوتھی وکٹ پر پھر آسٹریلین بلے بازوں نے اننگز کو آگے بڑھانے کی کوشش کی تاہم اس مرتبہ 144 کے مجموعے پر 11 رنز بنانے والے جوش انگلس میدان بدر ہوئے، انہیں بھی جاڈیجا نے آئوٹ کیا۔ وکٹ کی ایک جانب اسٹیو اسمتھ رنز بنانے کا سلسلہ جاری رکھے ہوئے تھے لیکن اس مرتبہ انکے ساتھ ایلکس کیری آئے ، دونوں کے درمیان ففٹی پارٹنرشپ بنی ۔ نئے آنے والے بلے باز گلین میکسویل تھے، وہ چھکا لگانے کے بعد اگلی ہی گیند پر ورون چکرورتی کی گیند پر بولڈ ہوگئے۔ یہاں ذمہ داری ایلکس کیری نے سنبھالی اور اپنی ٹیم کے اسکور کو آگے بڑھاتے رہے، وہ 61 رنز کی اننگز کھیل کر پویلین لوٹے۔ انکا ساتھ بین ڈارشوئس نے 19، ایڈم زیمپا نے 7 رنز بنا کر دیا جبکہ اختتامی لمحات میں نیتھن ایلس نے 10 اور تنویر سانگھا کے ایک رن نے آسٹریلیا کو 264 تک پہنچایا۔

بھارت کی جانب سے محمد شامی نے تین وکٹیں لیں، رورن چکرورتی اور رویندرا جاڈیجا نے دو دو جبکہ ہاردیک پانڈیا اور اکشر پٹیل نے ایک ایک وکٹ لی۔ دبئی انٹرنیشنل کرکٹ اسٹیڈیم میں ٹاس جیتنے کے بعد گفتگو کرتے ہوئے آسٹریلوی ٹیم کے کپتان اسٹیواسمتھ نے کہا کہ آج کے میچ کے لیے ٹیم میں 2 تبدیلیاں کی ہیں۔اس موقع پر بھارتی ٹیم کے کپتان روہت شرما نے کہا کہ ہم نے یہاں 3 میچز کھیلے ہیں، ہمیں اچھی کرکٹ کھیلنی ہے، چاہے پہلے بیٹنگ کریں یا بائولنگ۔

واضح رہے کہ دونوں ٹیموں نے اب تک ٹورنامنٹ میں اپنا کوئی بھی میچ نہیں ہارا ہے، بھارت اپنے تینوں میچ جیت کر سیمی فائنل میں پہنچا ہے جبکہ آسٹریلوی ٹیم صرف ایک میچ جیت کر سیمی فائنل تک پہنچی، گروپ مرحلے میں اس کے 2 میچ بارش کی نذر ہوئے تھے۔چیمپئنز ٹرافی کا دوسرا سیمی فائنل آج (بدھ کو )نیوزی لینڈ اور جنوبی افریقہ کے درمیان لاہور میں کھیلا جائے گا جس کی فاتح ٹیم 9 مارچ کو دبئی کرکٹ سٹیڈیم میں بھارت سے ٹکرائے گی۔